Saudiya farmatsevtika kompaniyasi O‘zbekistonda 52 million dollarlik ishlab chiqarishni yo‘lga qo‘yadi

O‘zbekiston va Saudiya Arabistoni o‘rtasida umumiy qiymati 14 milliard dollarlik 15 bitim imzolandi.

Ulardan biri Jamjoom Pharma farmatsevtika kompaniyasi bilan tuzilgan shartnoma edi. Kompaniya vitse-prezidenti Mahmud Jamjum Arab News bilan suhbatda uning ayrim tafsilotlarini oshkor qildi.

Shartnoma shartlariga ko‘ra, Jamjoom Pharma O‘zbekistonga 52 million dollar sarmoya kiritadi. Agentlik suhbatdoshining so‘zlariga ko‘ra, kompaniya Markaziy Osiyo davlatlari bozorlariga chiqish uchun respublikadan tramplin sifatida foydalanishni rejalashtirgan.

Jamjoom Pharma O‘zbekiston bozorida uning arizasi rasmiylar tomonidan ma’qullangandan so‘ng darhol ishlay boshlaydi. Saudiya kompaniyasi vitse-prezidenti kelgusida O‘zbekistonda ishlab chiqarishni yo‘lga qo‘yish rejalashtirilganini ham ta’kidladi.

Aprel oyida Shavkat Mirziyoyev yirik xorijiy farmatsevtika kompaniyalarini mahalliy dori vositalari ishlab chiqarish loyihalariga jalb etish bo‘yicha topshiriq bergan edi. Joriy yilda mazkur yo‘nalishda umumiy qiymati 80 million dollar bo‘lgan 34 ta loyiha amalga oshirilishi rejalashtirilgan edi.