O‘zbekiston va Turkmaniston ko‘p qirrali hamkorlikni rivojlantirish niyatida

Joriy yilning 7 sentabr kuni Toshkent shahrida O‘zbekiston Respublikasi Bosh vazirining o‘rinbosari – Investitsiyalar va tashqi savdo vaziri Jamshid Xo‘jayev Turkmaniston hukumat delegatsiyasi mamlakatimizga tashrif doirasida bo‘lib turgan Turkmaniston Vazirlar Mahkamasi Raisining o‘rinbosari Botir Atdaev bilan uchrashdi. 

Suhbat chog‘ida Turkmaniston Prezidentining joriy yil iyul oyida O‘zbekistonga davlat tashrifidan so‘ng yangi sur’at kasb etgan ikki davlat o‘rtasidagi munosabatlar izchil rivojlanib borayotgani alohida ta’kidlandi.

Qayd etilishicha, 2021-yilda tovar ayirboshlash hajmi 67 foizga oshib, 902 million dollarga yetgan. Joriy yilda bu ko‘rsatkich yana 9 foizga oshib, 486 million dollarni tashkil etdi. O‘zaro tovar ayirboshlash hajmini oshirish bo‘yicha kompleks chora-tadbirlar ko‘rish muhimligi ta’kidlandi.

O‘zbekiston va Turkmaniston o‘rtasida 2022-2025-yillarda Savdo-iqtisodiy hamkorlik va sanoat kooperatsiyasini rivojlantirish dasturining amalga oshirilishini hisobga olgan holda sanoat kooperatsiyasini rivojlantirish istiqbollari muhokama qilindi.

Tomonlar, shuningdek, joriy yil oxirigacha Savdo-iqtisodiy, ilmiy-texnikaviy va madaniy hamkorlik bo‘yicha O‘zbekiston-Turkmaniston qo‘shma komissiyasining navbatdagi 17-yig‘ilishini o‘tkazish imkoniyatlarini ko‘rib chiqdilar.

Batafsilroq, aniq istiqbollar kontekstida tomonlar delegatsiyalarning kengaytirilgan tarkibidagi hamkorlikni muhokama qildilar – muloqotga ikki mamlakatning asosiy vazirlik va idoralari, tarmoq birlashmalari va mahalliy hokimiyat organlari rahbarlari taklif etildi.

Tomonlar yaqin kelajakda o‘zaro tovar ayirboshlash hajmini 2 milliard dollarga yetkazish bo‘yicha zarur chora-tadbirlar kompleksini ko‘rishga o‘zaro tayyor ekanliklarini bildirdilar.

Ikki davlat oʻrtasidagi sarmoyaviy hamkorlikni chuqurlashtirish istiqbollari koʻrib chiqildi. Bugungi kunda O‘zbekistonda turkmaniston kapitali ishtirokidagi 173 ta korxona, jumladan, 69 ta qo‘shma korxona va 104 tasi 100 foiz xorijiy kapital ishtirokida faoliyat yuritmoqda. Ikki mamlakatda tayyor toʻqimachilik, farmatsevtika, qurilish va qishloq xoʻjaligi mahsulotlari ishlab chiqarish boʻyicha qoʻshma loyihalar sonini sezilarli darajada oshirish boʻyicha kelishuvga erishildi. Bundan tashqari, Turkmanistonda avtomobillar va qishloq xoʻjaligi texnikasi ishlab chiqarishni tashkil etish, shuningdek, maishiy texnika qoʻshma ishlab chiqarishni yoʻlga qoʻyishdan oʻzaro manfaatdorlik bildirildi.

Ikki davlat hududi orqali yuklar tranzitini rag‘batlantirish, dengiz portlari imkoniyatlaridan foydalangan holda xalqaro transport yo‘laklari bo‘ylab tajriba-sinov tashishni tashkil etish chora-tadbirlarini hisobga olgan holda transport-logistika aloqalarini kengaytirish imkoniyatlari muhokama qilindi.

Uchrashuv yakunlari boʻyicha ikki davlat oʻrtasidagi koʻp qirrali hamkorlikni kengaytirish maqsadida muhokama qilingan barcha yoʻnalishlar boʻyicha hamkorlikni davom ettirish majburiyati bildirildi.