ISSVda Abu Bakr Zadran boshchiligidagi Afg‘oniston delegatsiyasi bilan uchrashuv bo‘lib o‘tdi

ISSVda Abu Bakr Zadran boshchiligidagi Afg‘oniston delegatsiyasi bilan uchrashuv bo‘lib o‘tdi, deb xabar qilmoqda vazirlik matbuot xizmati. Muloqotda 50 dan ortiq Afg‘oniston korxonalari vakillari hamda mamlakatimizning oziq-ovqat, to‘qimachilik, kimyo va qurilish sohalaridagi kompaniyalari ishtirok etdi.

Tomonlar savdo-iqtisodiy hamkorlik istiqbollarini muhokama qildilar. Ikki davlat tarmoq uyushmalari o‘rtasida to‘g‘ridan-to‘g‘ri aloqalarni jonlantirish va munosabatlarni o‘rnatish hamkorlikning ustuvor yo‘nalishi sifatida e’tirof etildi.

Sanoat kooperatsiyasiga alohida e’tibor qaratildi. O‘zbekistonlik ishlab chiqaruvchilar o‘zlarining eksport salohiyatini namoyish etgan bo‘lsalar, Afg‘oniston tomoni qishloq xo‘jaligi, tog‘-kon sanoati va logistika sohalarini asosiy maqsadlar sifatida belgilab oldi. Shuningdek, qo‘shma loyihalarni amalga oshirish, texnologiyalar almashinuvi va kadrlar tayyorlash imkoniyatlari ko‘rib chiqildi.

B2B muzokaralarida tadbirkorlar mahsulot yetkazib berish va yangi bozorlarga chiqish masalalarini kelishib oldilar. O‘zbekiston kompaniyalari uzoq muddatli sheriklikka tayyor ekanliklarini bildirdilar. Shu bilan birga, savdo jarayonlarini soddalashtirish va tranzit yo‘laklarini rivojlantirish mavzulari ham diqqat markazida bo‘ldi.

Uchrashuv yakunida amaliy hamkorlikni mustahkamlash, ikki tomonlama kun tartibidagi muhim masalalar bo‘yicha konstruktiv muloqotni davom ettirish hamda biznes vakillari o‘rtasida navbatdagi uchrashuvlarni tashkil etish borasida o‘zaro kelishuvga erishildi.