O‘zbekistonning ishbilarmonlik muhiti fevral oyida o‘sish sur’atini ko‘rsatdi – Iqtisodiy tadqiqotlar va islohotlar markazi so‘rovi

Fevral oyida ishbilarmonlik muhitining umumiy ko‘rsatkichi 60 punktni tashkil etdi va shu yilning yanvar oyiga nisbatan 1 punktga oshdi, bu mamlakatdagi ishbilarmonlik muhitining holatini ijobiy deb baholaydi tahlilchilar.

Iqtisodiy tadqiqotlar va islohotlar markazi (Markaz) respublikadagi korxonalar o‘rtasida navbatdagi so‘rovnomani o‘tkazdi. Ikki yo‘nalish bo‘yicha o‘tkazilgan so‘rovda 1000 dan ortiq korxona ishtirok etdi: biznesning hozirgi holatini sifatli baholash va tadbirkorlarning kelgusi uch oy davomida o‘z biznesini rivojlantirish istiqbollariga bo‘lgan umidlari.

Joriy yilning fevral oyida ishbilarmonlik muhitining umumiy ko‘rsatkichi 60 punktni tashkil etdi va shu yilning yanvar oyiga nisbatan 1 punktga oshdi, bu mamlakatdagi ishbilarmonlik muhitining holatini ijobiy deb baholaydi (2021 yil fevral oyida – 60 punkt; shu yilning yanvar oyida – 59 punkt).

Ishbilarmonlik muhitining joriy holat ko‘rsatkichi 43 punktni tashkil etdi, bu tadbirkorlarning o‘z biznesining hozirgi holatiga nisbatan ijobiy kayfiyatini tavsiflaydi (2021 yil fevral – 44 punkt).

So‘rovda qatnashgan tadbirkorlarning 43%i o‘z biznesining hozirgi holatini yaxshi deb qayd etdi.

So‘nggi 3 oy ichida biznesning holati qanday o‘zgarganligi haqidagi savolga tadbirkorlarning 29% – yaxshilandi, 53% – o‘zgarmadi va 18% – yomonlashdi deb javob berdi.
39% korxonalarda tovar/xizmatlarga bo‘lgan talab yaxshilandi, xodimlar soni esa 22% korxonalarda oshdi.

Tarmoqlar kesimida ishbilarmonlik muhiti ko‘rsatkichi:
qurilish – 30 punkt;
sanoat – 39 punkt;
qishloq xo‘jaligi – 48 punkt;
xizmat ko‘rsatish -44 punkt.

Biznesni rivojlantirish istiqbollarini kutish ko‘rsatkichi 79 punktni tashkil etdi, bu esa tadbirkorlarning kelgusi 3 oy davomida biznesni rivojlantirish istiqbollari haqidagi umidlarini optimistik deb aks ettiradi.

Tadbirkorlarning 80% o‘zlarining biznes istiqbollari yaxshilanishiga ishonadi. 73% korxonalarda tovar va xizmatlarga bo‘lgan talab yaxshilanishi, ishchilar soni 68%ga oshishi kutilmoqda.

Tadbirkorlarning 22% kelgusi 3 oy ichida tovarlar/xizmatlar narxlarining ko‘tarilishini kutishmoqda, 29% narxlar o‘zgarmaydi va 3% narxlar pasayadi deb hisoblaydi.

Respondentlarning 46%i yaqin kelajakda o‘z tovarlari/xizmatlari narxi qanday o‘zgarishini bilishmaydi.

Tarmoqlar kesimida ishbilarmonlik faoliyatining istiqbollarini kutish ko‘rsatkichi:
qishloq xo‘jaligida – 88 punkt;
sanoatda – 81 punkt;
qurilishda – 84 punkt;
xizmat ko‘rsatishda – 69 punkt.

Umuman olganda, mavjud vaziyat va istiqboldagi kutilmalar o‘rtasidagi bog‘liqlik shuni anglatadiki, tadbirkorlik sub’yektlarining taxminlariga ko‘ra, iqtisodiyotni ijobiy rivojlantirish tendensiyasi keyingi 3 oy ham davom etadi.