Tel-Avivda O‘zbekiston-Isroil biznes-forumi bo‘lib o‘tdi

28-29-iyun kunlari Tel-Aviv shahrida O‘zbekiston-Isroil biznes-forumi bo‘lib o‘tdi.

Forum O‘zbekiston elchixonasi tomonidan “Isroil-O‘zbekiston” savdo palatasi, Isroil eksport instituti va Isroil sanoatchilar uyushmasi ko‘magida mamlakatimizning faxriy konsuli sifatida tashkil etildi.

Ta’kidlash joizki, ikki tomonlama munosabatlar tarixida bunday formatdagi tadbir so‘nggi o‘n yillikda ilk bor Isroilda o‘tkazilmoqda.

Forumda O‘zbekiston tomonidan rasmiy va ishbilarmon doiralar, xususan, Toshkent va Samarqand viloyatlaridagi to‘qimachilik, kimyo, elektrotexnika, farmatsevtika, charm sanoati uyushmalari, korxonalari vakillari ishtirok etdi.

“Isroil-O‘zbekiston” Savdo-sanoat palatasi prezidenti Ron Doron o‘zining qutlov so‘zida ikki davlat o‘rtasidagi savdo va hamkorlikni kengaytirishda salmoqli salohiyat saqlanib qolganligini ta’kidladi. Yaqinda tashkil etilgan u rahbarlik qilayotgan Savdo-sanoat palatasi ishbilarmonlik aloqalarini rivojlantirishga qaratilgan.

O‘zbekiston elchisi Feruza Maxmudova O‘zbekiston-Isroil biznes hamkorligi va loyihalari uchun yangi yo‘nalishlar, xususan, qishloq va suv xo‘jaligining an’anaviy yo‘nalishlari bilan cheklanib qolmasdan, kimyo, elektrotexnika, farmatsevtika sanoatida loyihalar ochish dolzarbligiga alohida e’tibor qaratdi.

Investitsiyalar va tashqi savdo vazirligi investitsiya loyihalarini tayyorlash markazi direktorining birinchi oʻrinbosari Murod Mirzayev boshchiligidagi Oʻzbekiston delegatsiyasi mamlakatimiz, jumladan, Samarqand va Buxoro viloyatlarining investitsiya imkoniyatlari va eksport salohiyati taqdimotlarini oʻtkazdi.

B2B uchrashuvlari doirasida toʻqimachilik, elektrotexnika, charm, kimyo va farmatsevtika sanoati sohalarida savdo-eksport operatsiyalari hamda hamkorlikni rivojlantirish maqsadida aloqalar oʻrnatildi. O‘zbekiston agrosanoat kompaniyalari qishloq xo‘jaligi texnologiyalarini jalb etish, sut-sutchilik fermalarini ishga tushirish, irrigatsiya yechimlari bo‘yicha hamkorlikni yanada rivojlantirish bo‘yicha kelishuvga erishdi.

Forum doirasida delegatsiya agrosanoat korxonalarida bo‘lib, chorvachilik va issiqxona xo‘jaligi sohasidagi ilg‘or tajriba va innovatsion texnologiyalar bilan yaqindan tanishdi.

Oʻzbekiston Farmatsevtika sanoatini rivojlantirish agentligi direktori oʻrinbosari Jamshid Eshmuratov boshchiligidagi farmatsevtika kompaniyalari vakillari Isroil Sogʻliqni saqlash vazirligi huzuridagi Dori vositalarini standartlashtirish va nazorat qilish instituti rahbariyati bilan muzokaralar oʻtkazdi. natijada dori vositalari, tibbiyot buyumlari va tibbiyot texnikasini roʻyxatga olish yoʻnalishlarida tajriba almashish boʻyicha kelishuvlarga erishildi.