“Toshkent – ​​kam uglerodli avtomobil transportiga investitsiyalarni jalb qilishni jadallashtirish” loyihasi ishga tushirildi

O‘zbekiston Transport vazirligi va BMT Taraqqiyot dasturi hamkorligida “Toshkent – ​​kam uglerodli avtomobil transportiga sarmoya kiritishni jadallashtirish” qo‘shma loyihasini amalga oshirish boshlandi.

Loyihaning asosiy maqsadi transport orqali atmosferaga chiqarilayotgan zararli moddalar miqdorini kamaytirish, iqlim o‘zgarishi va uning oqibatlariga qarshi kurashish bo‘yicha shoshilinch chora-tadbirlarni ko‘rish orqali inklyuziv, xavfsiz va barqaror shahar va aholi punktlarini ta’minlashdan iborat.

Global ekologik fond (GEF) ushbu loyihani moliyalashtirish uchun 3,57 million dollar ajratdi. Loyihani amalga oshirish uchun BMTTD yana 300 ming dollar ajratadi. Loyihada O‘zbekistonning ulushi 25,57 million dollarni tashkil etadi.

Loyiha Transport vazirligi tomonidan vazirliklar, idoralar va tashkilotlar bilan birgalikda 2022-2027-yillar davomida amalga oshiriladi.

Mazkur loyihani amalga oshirish jarayonida Toshkent shahridagi Shota Rustaveli ko‘chasini rekonstruksiya qilish, ushbu ko‘chada yashil shahar transport yo‘lagini yaratish, piyodalar va velosiped yo‘laklarini, shuningdek, jamoat transporti uchun alohida yo‘laklarni tashkil etish rejalashtirilgan.

Shuningdek, yashil shahar transport yo‘lagi bo‘ylab elektr avtobuslarini yo‘lga qo‘yish rejalashtirilgan, buning natijasida ijtimoiy, iqtisodiy va ekologik ko‘rsatkichlar yig‘ilib, tahlil qilinadi hamda natijalar asosida O‘zbekistonda elektr transportini rivojlantirish bo‘yicha yo‘l xaritasi va strategiyasi ishlab chiqiladi. 

Bundan tashqari, loyihani amalga oshirishning ijobiy tajribasidan kelib chiqib, O‘zbekistonning boshqa shaharlarida yashil shahar transport yo‘laklarini joriy etish rejalashtirilgan.