O‘zbekistonning oltin-valyuta zaxiralari ko‘paydi

Markaziy bank O‘zbekistonning xalqaro zaxiralari to‘g‘risidagi ma’lumotlarni e’lon qildi.

2022-yilning 1-mart holatiga ko‘ra, O‘zbekistonning oltin-valyuta zaxiralari 35,36 mlrd dollarni tashkil qilgan. Taqqoslash uchun, bu ko‘rsatkich 2022-yil 1-fevral holatiga ko‘ra, 34,42 mlrd dollar bo‘lgan. Raqamlar o‘tgan bir oyda O‘zbekistonning rasmiy zaxiralari 935 mln dollarga oshganini ko‘rsatmoqda.
Fevral oyi davomida oltinning fizik hajmi sezilarli miqdorda: 11,6 mln troya unsiyadan* 10,9 mln troya unsiyaga (taxminan 21,77 tonna), qiymati esa 20,77 mlrd dollardan 20,72 mlrd dollarga kamaygan. Bu jahon bozorida oltin narxlarining sezilarli darajada qimmatlashgani bilan izohlanishi mumkin.
Shuningdek, zaxira aktivlari tarkibidagi xorijiy valyuta zaxiralari 12,54 mlrd dollardan 13,52 mlrd dollarga yoki 983,2 mln dollarga oshgan.
Xalqaro tashkilotlarning tavsiyalariga ko‘ra, rivojlanayotgan davlatlar uchun zaxiralar kamida 3 oylik importni qoplashi kerak.
Ma’lumot uchun, O‘zbekiston yalpi xalqaro zaxiralari 2022-yil boshidan beri 221,4 mln dollarga yoki 0,6 foizga oshgan. Bunda oltin narxi yil boshidagi 1799,25 dollardan 1903,3 dollargacha o‘sishining ta’siri 1,1 mlrd dollarni tashkil qiladi.

*1 unsiya=31,1 gramm