Ispaniyaning Malaga shahrida O‘zbekistonning sarmoyaviy salohiyatiga bag‘ishlangan davra suhbati bo‘lib o‘tdi

Mamlakatimizning Ispaniyadagi elchixonasi tomonidan Malaga shahri Savdo-sanoat palatasi bilan hamkorlikda “O‘zbekiston – Ispaniya: yangi sarmoyaviy imkoniyatlar” mavzuida “davra suhbati” tashkil etildi, deb xabar beradi “Dunyo” axborot agentligi muxbiri.

Tadbirda Ispaniyaning Andalusiya provinsiyasi ishbilarmon doiralari, jumladan, zaytun moyi, vino, meva-sabzavot konservalari, pirit va mis rudalari ishlab chiqaruvchilari, polimetall rudalarini qazib oluvchi korxonalar, to‘qimachilik korxonalari va boshqalar ishtirok etdi.

“Davra suhbati” davomida ishtirokchilarga mamlakatimizning iqtisodiy salohiyati, sarmoyaviy hamkorlikning yangi imkoniyatlari haqida batafsil ma’lumotlar berildi. Xususan, ko‘mir sanoati, muqobil energiya, vinochilik kabi sohalardagi istiqbolli loyihalar muhokama qilindi.

Malaga Savdo-sanoat palatasi Bosh kotibi Jeronimo Peres Krasera o‘z nutqida tadbir ishtirokchilarining keng doirasi Ispaniya ishbilarmon doiralarining O‘zbekiston bilan savdo-iqtisodiy va sarmoyaviy hamkorlikni rivojlantirishga katta qiziqish bildirayotganidan dalolat ekanini ta’kidladi.

Uning soʻzlariga koʻra, Oʻzbekiston Janubiy Osiyo, Yevropa va Xitoyni bogʻlovchi Osiyo mintaqasida strategik mavqega ega. Bu borada ispan kompaniyalarining O‘zbekiston bozoriga kirishi ulkan Osiyo bozoriga chiqish uchun keng imkoniyatlar ochmoqda. Shuningdek, mamlakatimiz makroiqtisodiy ko‘rsatkichlari yuqoriligi va iqtisodiyoti barqaror rivojlanayotganini alohida ta’kidladi. Uning soʻzlariga koʻra, yalpi ichki mahsulot oʻsishining taʼsirchan dinamikasi Ispaniyaning yetakchi kompaniyalariga Oʻzbekistonni sarmoyaviy hamkorlik uchun jozibador hamkor sifatida tanlashda ishonch uygʻotadigan muhim omil hisoblanadi.

Ispaniyaning “Cordivias SA” to‘qimachilik korxonasi rahbari Fernando Alassii bugungi kunda jadal rivojlanish dinamikasi tufayli O‘zbekistonda ishbilarmonlik aloqalarini chuqurlashtirish uchun favqulodda qulay sharoitlar yaratilganini ta’kidladi. Uning fikricha, qo‘shilgan qiymat solig‘i stavkasi 20 foizdan 12 foizga tushirilgani, shuningdek, o‘z ehtiyojlari uchun tovar olib kiruvchi korxonalar kamida 33 foiz stavkada bojxona to‘lovlaridan ozod etilgani jonlanish uchun yaxshi signaldir.

O‘z navbatida, O‘zbekiston tomoni zamonaviy texnologiyalar va nou-xaularni jalb etish, yuqori qo‘shimcha qiymatga ega keng turdagi tayyor eksport mahsulotlari ishlab chiqarish quvvatlarini yaratishni nazarda tutuvchi savdo-iqtisodiy hamkorlikdan manfaatdor ekanini alohida ta’kidladi.

Tadbir so‘ngida ishbilarmonlik aloqalarini davom ettirishdan o‘zaro manfaatdorlik bildirildi..