O‘zbekiston Investitsiyalar Vazirligi strategik hamkorlikni mustahkamlash maqsadida ‘‘Citigroup’’ delegatsiyasi bilan uchrashdi

25-iyun kuni O‘zbekiston Respublikasi Investitsiyalar, sanoat va savdo vazirligida ‘‘Citigroup’’ kompaniyasining mijozlar bilan ishlash bo‘yicha bosh direktori Devid Livingston boshchiligidagi delegatsiya bilan uchrashuv bo‘lib o‘tdi, deb xabar bermoqda vazirlik matbuot xizmati.

‘‘Citigroup’’ — rivojlanayotgan bozorlar bo‘yicha katta tajribaga ega bo‘lgan, dunyodagi yetakchi moliyaviy korporatsiyalardan biridir. Bunday tuzilmalar bilan hamkorlik qilish O‘zbekistonni mintaqaviy moliyaviy markazga aylantirishga qaratilgan strategik maqsadlarga mos keladi.

Tomonlar investitsiyalarni jalb etish, eksportni qo‘llab-quvvatlash va davlat-xususiy sheriklik asosidagi loyihalarni rivojlantirish yo‘nalishlarida hamkorlikni kengaytirish masalalarini muhokama qildilar.

Yaqin kunlarda ‘‘Citigroup’’ Toshkent shahrida o‘z vakolatxonasini ochishni rejalashtirayotgani ta’kidlandi — bu amalga oshirilayotgan barcha loyihalar doirasida hamkorlikni kengaytirish yo‘lida muhim qadam bo‘ladi.