Investitsiyalar, sanoat va savdo vaziri Spora Global kompaniyasi bosh ijrochi direktori bilan uchrashdi

O‘zbekiston Respublikasi Investitsiyalar, sanoat va savdo vaziri Laziz Kudratov Spora Global kompaniyasi bosh ijrochi direktori Fio Fahmi bilan uchrashdi, deb xabar bermoqda vazirlik matbuot xizmati.

Spora Global – mehmonxona ko‘chmas mulkini rivojlantirish, kurort majmualarini barpo etish hamda kompleks qurilish loyihalarini amalga oshirishga ixtisoslashgan xususiy Malayziya kompaniyasi hisoblanadi.

Muzokaralar davomida investitsiya loyihalarini amalga oshirish istiqbollari muhokama qilindi. Tomonlar turizm infratuzilmasi, mehmonxona biznesi, development, hududlarni kompleks rivojlantirish, shuningdek zamonaviy rekreatsion obyektlarni barpo etish yo‘nalishlarida hamkorlik imkoniyatlarini ko‘rib chiqdilar.

Uchrashuv yakunida tomonlar hamkorlikni yanada kengaytirish va istiqbolli investitsiya loyihalarini birgalikda amalga oshirishga o‘zaro tayyorligini bildirdilar.