ISSVda davlat auditi va moliyaviy nazorat tizimini takomillashtirishga bag‘ishlangan o‘quv seminari bo‘lib o‘tdi

ISSVda davlat auditi va moliyaviy nazorat tizimini takomillashtirishga bag‘ishlangan o‘quv seminari bo‘lib o‘tdi, deb xabar bermoqda vazirlik matbuot xizmati. Mazkur tadbir Prezidentning 2025-yil 18-dekabrdagi PF-252-sonli Farmoni ijrosini ta’minlashga qaratilgan bo‘lib, unda nazoratning yangi modeli, ya’ni «aniqlash emas, balki oldini olish» tamoyiliga o‘tish belgilangan. Endilikda asosiy e’tibor qoidabuzarlik oqibatlari bilan kurashishga emas, balki ularning kelib chiqish sabablarini bartaraf etishga qaratiladi.

Yig‘ilish Investitsiyalar, sanoat va savdo vazirining o‘rinbosari Akram Aliyev raisligida o‘tkazildi. Muhokamalarda Hisob palatasi vakili N. J. Sagindikov, moliya departamentlari rahbarlari, bosh hisobchilar hamda xaridlar, komplaens va ichki audit xizmatlari mutaxassislari ishtirok etdilar. Qatnashchilarga xavf-xatarlarni barvaqt aniqlash, davlat mablag‘laridan maqsadli foydalanishni ta’minlash hamda davlat xaridlarida korrupsiya omillarini kamaytirish bo‘yicha tegishli tavsiyalar berildi.

Shuningdek, «bosh inspektorlar instituti»ni joriy etish, raqamli nazorat va doimiy monitoring masalalariga alohida to‘xtalib o‘tildi. Ushbu vositalar har bir budjet so‘mining sarflanishi ustidan qat’iy nazorat o‘rnatish hamda davlat resurslaridan foydalanishning shaffofligi va manzilliligini ta’minlashga xizmat qilishi kutilmoqda.