O‘zbekistonlik startaplar Singapurda o‘tkaziladigan SLINGSHOT tanloviga taklif etiladi

Singapurning Startup SG agentligi SLINGSHOT 2023 Deep Tech startap tanloviga arizalarni qabul qilmoqda. Bu haqida IT Park matbuot xizmatiga tayanib, Spot xabar beradi.

Tanlovda Osiyo mamlakatlari startaplari 1,2 million Singapur dollari (888,89 ming dollar) mukofot jamg‘armasi uchun kurash olib boradi. Jamoalar o’zlarining innovatsion loyihalarini MVP bosqichida beshta yo’nalishdan birida taqdim etishlari mumkin:

• transformativ raqamli texnologiyalar (AI, blokcheyn, katta ma’lumotlar, kengaytirilgan va virtual haqiqat);
• sog’liqni saqlash va biotibbiyot (raqamli tibbiyot, biotexnologiya);
• ishlab chiqarish, savdo va aloqa («Internet narsalar», robototexnika, transport, logistika);
• atrof-muhit, energetika va yashil texnologiyalar (chiqindilarni boshqarish, suv resurslarini boshqarish, qayta tiklanadigan energiya, AgriTech);
• iste’molchi ommaviy axborot vositalari, tovarlar va xizmatlar (reklama, fintech, EdTech, FoodTech, mahsulotni shaxsiylashtirish).

Eng yaxshi 50 ta jamoa oktabr oyida Singapurga homiylik bilan sayohat qiladi. U yerda ular tanlov finalida ishtirok etadilar, shuningdek, o‘z loyihalarini Singapur innovatsiyalar va texnologiyalar haftaligi (SWITCH) 2023 da taqdim etishlari mumkin bo‘ladi.

Eng yaxshi 10 final ishtirokchisi Startup SG dan 50 000 SGD dan 200 000 SGD ($37 000 – $ 148 000) gacha bo’lgan pul grantlarini oladi. Bundan tashqari, eng yaxshi 3 ta startap LaunchPad’da bir yarim yilgacha bepul ishlay oladi.

SLINGSHOTda ishtirok etish uchun havola orqali roʻyxatdan oʻtish va arizangizni topshirishingiz kerak. Yakuniy muddat – 17 iyul.