Saudiya Arabistonining ACWA Power kompaniyasi O‘zbekistonga sarmoya kiritishni rejalashtirmoqda

Saudiyaning energetik giganti ACWA Power O‘zbekistonga yangi sarmoya kiritishni rejalashtirmoqda va o‘zining Markaziy Osiyo davlatining energetika sektoridagi yetakchi xorijiy investor maqomini tasdiqladi, deb xabar beradi “ARAB NEWS”.

Kompaniyaning Oʻzbekiston boʻyicha bosh moliya direktori (CFO) Sumendra Routning IV Toshkent xalqaro investitsiya forumida maʼlum qilishicha, kompaniyaning Oʻzbekistonga kiritgan umumiy sarmoyasi allaqachon 15 milliard dollarga yetgan va qoʻshma loyihalarning joriy portfeli 19 ta energiya tashabbusini qamrab olgan boʻlib, ulardan 18 tasi qayta tiklanadigan energiya manbalariga tegishli.

‘‘Biz bu bilan toʻxtab qolmoqchi emasmiz. Maqsadimiz sarmoyalarni kengaytirishdir. Ushbu forum davomida Oʻzbekiston hukumati bilan yana 5 milliard dollarlik shartnoma imzolashni rejalashtirganmiz’’, — dedi Rout.

Forum davomida Rout, shuningdek, barqaror iqtisodiy rivojlanishni ta’minlashda, xususan, kichik va o’rta korxonalarda islomiy moliya vositalarining muhimligini ta’kidladi.

Uning qoʻshimcha qilishicha, shariatga muvofiq moliyalashtirish mexanizmlari anʼanaviy moliyalashtirish vositalariga nisbatan kichik va oʻrta biznesni yanada samarali qoʻllab-quvvatlashga qodir.

“Biz O‘zbekiston bilan o‘z tajribamizni baham ko‘rishga va yanada inklyuziv moliya tizimini yaratishga hissa qo‘shishga tayyormiz”, — dedi Raut.

Forum davomida ACWA Power Markaziy Osiyo boʻyicha prezidenti Abid Malik Oʻzbekiston shamol turbinasi komponentlarini, jumladan qanot va turbinalar ishlab chiqarishni mahalliylashtirishga tayyorligini maʼlum qildi.

Malikning qoʻshimcha qilishicha, ACWA Power yetkazib beruvchilar bilan yaqindan hamkorlik qiladi va Oʻzbekistonda qayta tiklanadigan energiya loyihalarida ishlayotgan mahalliy korxonalarga texnik yordam koʻrsatishga intiladi.

Hozirda Qoraqalpog‘istonda 200 megavatt quvvatga ega shamol energetikasi loyihasi doirasida ACWA Power o‘zining turbina yetkazib beruvchisiga O‘zbekistonda mahalliy ishlab chiqarish korxonalarini yo‘lga qo‘yish vazifasini qo‘ydi.

“Bizning yetkazib beruvchimiz yaqin kelajakda mamlakat ichida shamol turbinalari va qanotlarini ishlab chiqarishni yo‘lga qo‘yishni rejalashtirmoqda”, — deya qo‘shimcha qildi Malik.

Uning so‘zlariga ko‘ra, O‘zbekiston shu oyda yashil vodorod ishlab chiqarishni boshlaydi, uning yillik ishlab chiqarish quvvati 3000 tonnani tashkil qiladi.

“Bu O‘zbekistonning global yashil vodorod xaritasidagi mavqeini oshirishiga ishonamiz’’, – dedi Malik.

2023-yilda O‘zbekiston Prezidenti Shavkat Mirziyoyev ACWA Power kompaniyasi bilan hamkorlikda Toshkent viloyatida tajribali yashil vodorod inshootini ishga tushirdi.

88 million dollarlik loyiha ikki bosqichda amalga oshirilmoqda, birinchi bosqichda ishlab chiqarish shu oyda boshlanishi kutilmoqda.

Yashil vodorod ishlab chiqarish O‘zbekistonning 2030 yilgacha 20 gigavatt toza energiya quvvatiga erishish maqsadiga mos keladi.

Mamlakat quyosh, shamol va gidroelektr energiyasini kengaytirishga, shuningdek, qazib olinadigan yoqilg’iga qaramlikni kamaytirish uchun tabiiy resurslardan foydalanishga ustuvor ahamiyat qaratmoqda.

Aprel oyida ACWA Power O‘zbekistondagi ikkita yirik shamol elektr stansiyalarida tijorat faoliyatini boshladi.

Dekabr oyida kompaniya O‘zbekistonda shamol, quyosh va akkumulyator omborlarini o‘z ichiga olgan qayta tiklanadigan energiya manbalari bo‘yicha uchta tashabbusni ham boshladi.

Bu korxonalar qatoriga umumiy quvvati 1000 megavatt bo‘lgan Bosh va Jankeldi shamol elektr stansiyalari va elektr uzatish liniyasi kiradi.

Bundan tashqari, Samarqand 1 va 2 quyosh energiyasi loyihalari mavjud bo’lib, ularning umumiy quvvati 1000 MVt quyosh energiyasi, 1000 MVt quvvatga ega batareya quvvatini saqlash tizimi mavjud. Toshkent BESS loyihasi 500 MVt/soat quvvatga ega.