Investitsiyalar, sanoat va savdo vaziri va Koreya Respublikasining O‘zbekiston Respublikasidagi elchisi o‘rtasida muzokaralar bo‘lib o‘tdi

Joriy yilning 26-iyul kuni investitsiyalar, sanoat va savdo vaziri Laziz Kudratov va Koreya Respublikasining O‘zbekiston Respublikasidagi elchisi Von Do Yon o‘rtasida muzokaralar bo‘lib o‘tdi, deb xabar beradi ISSV matbuot xizmati.

Uchrashuvda savdo-iqtisodiy va sarmoyaviy hamkorlikning bugungi holati va yanada kengaytirish chora-tadbirlari muhokama qilindi.

Oʻzaro tovar ayirboshlash hajmini oshirish va ikki mamlakat biznes tuzilmalari oʻrtasida sheriklik aloqalarini oʻrnatish boʻyicha oʻzaro chora-tadbirlar koʻrish boʻyicha kelishuvlarga erishildi. Shuningdek, ikki tomonlama savdo aloqalarini rivojlantirishga to‘sqinlik qilayotgan muammo va omillarni aniqlash va ularni tezkorlik bilan bartaraf etish bo‘yicha ishlar faollashtiriladi.

Tomonlar Koreyaning Kyongi-do provinsiyasi vakolatxonasining Toshkent shahrida ochilishini olqishladilar. Bu O‘zbekistonda investitsiya faoliyatini qo‘llab-quvvatlash uchun yaratilgan imtiyoz va preferensiyalardan foydalangan holda hududlararo hamkorlikni mustahkamlashga yordam beradi.

Koreya xalqaro hamkorlik agentligi (KOICA) va Iqtisodiy taraqqiyot va hamkorlik jamg‘armasi (EDFC) bilan hamkorlikni chuqurlashtirish istiqbollari alohida muhokama qilindi.

Uchrashuv yakunlari bo‘yicha tomonlar sheriklik munosabatlarini kengaytirishga tayyor ekanliklarini tasdiqladilar va muhokama qilingan vazifalarni jadal amalga oshirish doirasida amaliy hamkorlik formatini ishlab chiqdilar.