Osiyo taraqqiyot banki vakillari bilan hamkorlik aloqalari yuzasidan fikr almashildi

Joriy yilning 18-iyun kuni Osiyo taraqqiyot banki (OTB) vitse-prezidenti Bhargav Dasgupta boshchiligidagi delegatsiya vakillari hamda O‘zbekiston Respublikasi Bosh vaziri o‘rinbosari – Iqtisodiyot va moliya vaziri Jamshid Qo‘chqorov o‘rtasida uchrashuv bo‘lib o‘tdi, deb xabar qilmoqda vazirlik axborot xizmati.

Uchrashuvda OTBning xususiy sektorni rivojlantirish bo‘yicha mintaqaviy rahbari Enriko Pinali, OTBning Toshkentdagi vakolatxonasi rahbari Kanokpan Lao-Araya hamda Iqtisodiyot va moliya vaziri o‘rinbosari Umid Abidxadjayev, Ipotekani qayta moliyalashtirish kompaniyasining ijrochi direktori Murod Farmonov va boshqa mas’ul vakillar ishtirok etdi.

Muloqot davomida tomonlar o‘zaro manfaatli hamkorlik aloqalarini rivojlantirish, hamkorlikda amalga oshirilayotgan loyihalar natijalari hamda istiqboldagi rejalar, mamlakatimizdagi ijtimoiy-iqtisodiy tendensiyalar yuzasidan muhokamalar olib bordi.

Xususan, quyidagi yo‘nalishlarga alohida to‘xtalib o‘tildi:

• Infratuzilmani rivojlantirish loyihalarini qo‘llab-quvvatlash;
• Kichik va o‘rta biznesni rivojlantirish, jumladan, sun’iy intellekt va startap loyihalarni kengaytirish;
• Xususiy sektorni qo‘llab-quvvatlash;
• Mamlakatimizdagi makroiqtisodiy jarayonlar, xususan, inflatsiya darajasini past ko‘rsatkichlarda barqarorligini ta’minlash;
• Yashil transformatsiya jarayonlarini qo‘llab-quvvatlash, yangi loyihalarni amalga oshirish, shuningdek, ijtimoiy soha obyektlarida energiya samaradorligini oshirish;
• Davlat-xususiy sheriklik asosida amalga oshirilayotgan loyihalar, xususan, sog‘liqni saqlash sohasida hayotga tadbiq etilayotgan loyihalarni jadallashtirish;
• Ipoteka bozorini qo‘llab-quvvatlash;
• Suv resurslaridan samarali foydalanish yuzasidan loyihalarni kengaytirish;
• Xususiylashtirish jarayonlari.

Muzokaralar yakunida tomonlar o‘zaro hamkorlik aloqalarini mustahkamlash hamda yuqoridagi yo‘nalishlar yuzasidan fikrlar almashinuvi jarayonlarini kengaytirishga kelishib oldi.