O‘zbekistonda davlat-xususiy sheriklik (DXSh) mexanizmlari orqali qulay investitsiya muhitini yaratish

O‘zbekiston Respublikasi Investitsiyalar, sanoat va savdo vazirligi muvofiqlashtiruvi ostida tashkil etilgan TXIFning oxirgi kunida O‘zbekistonga investitsiya kiritish uchun shart-sharoitlarni yaxshilashda davlat-xususiy sherikchiligining roli asosiy mavzulardan biri bo‘ldi, deb xabar qilmoqda ISSV matbuot xizmati.

O‘zbekiston iqtisodiyot va moliya vaziri o‘rinbosari Ilhom Umrzoqovning aytishicha, 2025-yil 1-yanvar holatiga ko‘ra, O‘zbekistonda qariyb 28 milliard dollarlik DXSH loyihalari imzolangan, ularning qariyb 90 foizi energetika, asosan qayta tiklanuvchi energiya manbalari sohasiga to‘g‘ri keladi.

«Synergy» bosh amaliyot direktori Anand Rohatgi tashkilot uchun O‘zbekistondagi yo‘l haqiqatan ham ta’sirli bo‘lganini ta’kidladi. «Synergy» kompaniyasi mamlakatda 2017-yilda ish boshlagan va birinchi davlat-xususiy sheriklik loyihasida ishtirok etish imkoniyatiga ega bo‘lgan.

– Toshkentdagi ofisimiz haqiqatan ham muvaffaqiyatli bo‘ldi. Bu bizning eng katta ofislarimizdan biri. Bugungi kunga qadar biz 10 ta DXSH loyihasini muvaffaqiyatli yakunladik va bizda maslahatlashuv bosqichida bo‘lgan 30 ga yaqin yangi loyihalar portfeli mavjud», – deya qo‘shimcha qildi Anand Rohatgi.

Muhokama chog‘ida DXSH turli sohalarda muhim loyihalarni amalga oshirishga ko‘maklashishi, o‘zaro manfaat va barqaror iqtisodiy o‘sishni ta’minlashi ta’kidlandi. Normativ-huquqiy bazani mustahkamlash, imtiyozlar berish va shaffoflikni oshirish O‘zbekistonni xorijiy investorlar uchun yanada jozibador qiladi.

TAQA Water Solutions kompaniyasining strategiya bo‘yicha direktori Filipp de Kosta TAQA kompaniyasi taxminan besh-olti yildan beri O‘zbekistonda energetika sohasida Masdar sho‘ba korxonasi orqali faoliyat yuritayotganini eslatib o‘tdi.

– Ishonch bilan aytish mumkinki, O‘zbekiston bugungi kunda bu mexanizm bo‘yicha mintaqadagi eng yetuk davlatdir, – dedi Filipp de Kosta.

Spikerlar investitsiyalarni jalb qilish, infratuzilmani modernizatsiya qilish va O‘zbekiston iqtisodiyotini barqaror rivojlantirish uchun DXSH modelini samarali qo‘llash muhimligini ta’kidladilar.

 

Muhokamada YTTBning Yevroosiyo bo‘yicha infratuzilma departamenti direktori Yekaterina Miroshnik va InterHealth Canada bosh direktori katta maslahatchisi Nosir Masud ham ishtirok etdi.

Plenary kompaniyasining operatsion direktori Mustafo Faxur ijtimoiy infratuzilmaga investitsiya kiritishning ahamiyati haqida gapirib, maktablar, shifoxonalar va talabalar turar-joylarini qurish shunchaki iqtisodiy hisob-kitob emas, balki millat kelajagi va farovonligiga qo‘shilgan hissa ekanligini ta’kidladi.

Osiyo taraqqiyot bankining (OTB) xususiy sektorni rivojlantirish bo‘yicha mintaqaviy rahbari Enriko Pinali OTBning O‘zbekistonda DXSH modelini rivojlantirishdagi ishtiroki eng dastlabki bosqichlardan boshlanganini ta’kidladi. Buning natijasida mahalliy hokimiyat organlari endi mustaqil ravishda ishlay oladigan namunaviy va tushunarli shartnoma namunalari yaratildi. Pinaliga ko‘ra, rivojlanish banklarining haqiqiy muvaffaqiyati ularga ehtiyoj qolmaganda keladi – bu bozor shakllangani, bilimlar uzatilgani va rivojlanish bankining missiyasi bajarilganini anglatadi.