O‘zbekiston va Afg‘oniston o‘rtasida qariyb 1,2 milliard dollarlik eksport-import shartnomalari imzolandi

Kuni kecha Bosh vazir oʻrinbosari Jamshid Xoʻjayev boshchiligidagi Oʻzbekiston hukumat delegatsiyasi Kobul shahriga tashrif buyurdi, deb xabar bermoqda “Dunyo” axborot agentligi muxbiri.

Tashrif doirasida O‘zbekiston delegatsiyasi rahbarining Afg‘oniston Bosh vaziri o‘rinbosari mulla Abdul G‘ani Barodar bilan uchrashuvlari cheklangan va kengaytirilgan tarkibda bo‘lib o‘tdi. Uchrashuvlarda ikki mamlakat investitsiya, sanoat va savdo, qishloq, suv xoʻjaligi, konchilik va geologiya, energetika va transport vazirlari ishtirok etdi.

Ishtirokchilar ikki tomonlama hamkorlikning bugungi rivojlanishi va istiqbollari yuzasidan fikr almashdilar. Afg‘oniston tomoniga o‘zaro hamkorlikning qator jihatlari bo‘yicha takliflar taqdim etildi.

Afgʻoniston hukumati rahbari oʻrinbosari Oʻzbekiston delegatsiyasining Kobulga tashrifini qutladi, shuningdek, Hirot viloyatidagi zilziladan jabr koʻrgan oilalarga koʻrsatilayotgan insonparvarlik yordami uchun Oʻzbekiston rahbariyatiga minnatdorlik bildirdi.

Transport va tranzit masalalari iqtisodiy taraqqiyotning dvigateli ekanligini ta’kidlab, O‘zbekiston tomonining Afg‘oniston orqali Markaziy Osiyo va Janubiy Osiyoni bog‘lovchi transport koridorini yaratish loyihalarida ishtirokini yuqori baholadi.

Afg‘oniston va O‘zbekiston o‘rtasida iqtisodiy sohada foydalanilmayotgan ko‘plab imkoniyatlar mavjudligi va ularning amalga oshirilishi o‘zaro tovar ayirboshlash hajmini bir necha barobar oshirishga xizmat qilishi ta’kidlandi. O‘zbekiston tomoniga afg‘on investorlari, biznes vakillari va yuk mashinalari haydovchilari uchun yangi viza mexanizmi yaratilgani uchun ham minnatdorchilik bildirildi.

Abdul G‘ani Barodar tashrif doirasida “O‘zbekistonda ishlab chiqarilgan” mahsulotlar ko‘rgazmasining ochilishini qutladi.

Oʻz navbatida, Oʻzbekiston Bosh vazirining oʻrinbosari Jamshid Xoʻjayev delegatsiya tarkibiga besh nafar vazir kiritilgani barcha dolzarb masalalarni boʻlim yigʻilishlarida mazmunli muhokama qilish va tegishli qarorlar qabul qilish imkonini berganiga eʼtibor qaratdi.

Shuningdek, Oʻzbekiston Investitsiyalar, sanoat va savdo vazirligi tomonidan yaqin kelajakda oʻzaro tovar ayirboshlash hajmini 3 milliard dollarga yetkazish boʻyicha “Yoʻl xaritasi” ishlab chiqilgani qayd etildi.

Oʻzbekiston tomoni Afgʻonistonda transport/tranzit va elektr taʼminoti boʻyicha keng koʻlamli infratuzilma loyihalarida ishtirok etish, kadrlar tayyorlash va salohiyatini oshirishga tayyorligi yana bir bor taʼkidlandi.

Oʻzbekiston tomoni Oʻzbekistonda Afgʻonistonda ishlab chiqarilgan mahsulotlar koʻrgazmasini tashkil etishga tayyorligini maʼlum qildi.

Tashrif doirasida Kobul xalqaro ko‘rgazmalar markazida biznes-forum tashkil etilib, unda mahalliy ishbilarmon doiralarning 300 dan ortiq vakillari ishtirok etdi. Biznes-forumda O‘zbekiston Bosh vaziri o‘rinbosari Jamshid Xo‘jayev, Afg‘oniston sanoat va savdo vaziri Nuriddin Aziziy, Savdo-sanoat palatasi raisi Muhammad Yunus Mohmand so‘zga chiqdi.

Shundan soʻng Oʻzbekiston bosh vaziri oʻrinbosari Jamshid Xoʻjayev va Afgʻoniston sanoat va savdo vaziri Nuriddin Aziziy Oʻzbekistonda ishlab chiqarilayotgan mahsulotlar koʻrgazmasini rasman ochdi.

Ko‘rgazmada namoyish etilgan turli mahsulotlar mahalliy tadbirkorlar va ishtirokchilarda katta qiziqish uyg‘otdi. Ko‘rgazma doirasida O‘zbekiston va Afg‘oniston ishbilarmon doiralari vakillari o‘rtasida B2B va G2B muzokaralari tashkil etildi.

Tashrif doirasida o‘tkazilgan uchrashuv va muzokaralar chog‘ida tomonlar o‘rtasida umumiy qiymati qariyb 1,2 milliard AQSh dollariga teng eksport-import kelishuvlariga erishildi.