Belgradda O‘zbekiston va Serbiya o‘rtasidagi savdo-iqtisodiy va sarmoyaviy hamkorlikni kengaytirish masalalari muhokama qilindi

O‘zbekiston elchisi Oybek Shaxavdinov Belgradda Serbiya Ichki va tashqi savdo vazirligi davlat kotibi Nikola Stoyanovich bilan muzokaralar o‘tkazdi, deb xabar bermoqda “Dunyo” axborot agentligi muxbiri.

Tomonlar ikki davlat o‘rtasidagi savdo-iqtisodiy va sarmoyaviy hamkorlikni kengaytirish masalalari yuzasidan fikr almashib, mavjud salohiyatdan faol foydalanish muhimligini ta’kidladilar.

Oʻzaro hamkorlikning ikki tomonlama mexanizmlarini, jumladan, Oʻzbekiston-Serbiya Hukumatlararo komissiyasi faoliyatini tayyorlash va ishga tushirish, shuningdek, asosiy yoʻnalishlarda ikki tomonlama hamkorlikni chuqurlashtirishga qaratilgan shartnomaviy-huquqiy bazani shakllantirish masalalariga alohida eʼtibor qaratildi.

Uchrashuvda mehnat migratsiyasi sohasidagi o‘zaro hamkorlik masalalari, jumladan, viza tartib-taomillarini soddalashtirish va tegishli hukumatlararo bitimlarni tuzish istiqbollari ham ko‘rib chiqildi.