Madridda O‘zbekiston-Ispaniya iqtisodiy loyihalarini amalga oshirish istiqbollari muhokama qilindi

O‘zbekistonning Madriddagi elchixonasida ‘‘ACIR Janubiy Europe’’ prezidenti Eduard Gulyan bilan uchrashuv bo‘lib o‘tdi, deb xabar bermoqda “Dunyo” axborot agentligi muxbiri.

Tomonlar Ispaniya delegatsiyasining O‘zbekistonga tashrifi yakunlarini, qo‘shma loyihalarni amalga oshirishning borishini muhokama qildilar. Ushbu tashrif ikki tomonlama munosabatlarni mustahkamlashda muhim bosqich bo‘lgani ta’kidlandi. Uning doirasida 80 dan ortiq uchrashuvlar o‘tkazilib, muhim kelishuvlarga erishildi.

Xususan, ishlab chiqarishni mahalliylashtirish va yangi texnologiyalarni o‘zlashtirish, shuningdek, Ispaniyaning ‘‘Alcobendas HUB’’ modelini joriy etish bo‘yicha “Toshkent Pharma Park” aksiyadorlik jamiyati bilan hamkorlikni rivojlantirish istiqbollari, jumladan, pudratchi ishlab chiqarish formatidagi sheriklik va autsorsing masalalari muhokama qilindi.

Samarqand shahrida O‘zbekiston mahsulotlarini Yevropa bozorlariga yetkazib berishni yanada rivojlantirish maqsadida mahalliy hunarmandlar, zargarlar, to‘qimachilik korxonalari uyushmalari bilan aloqalar yo‘lga qo‘yilgan.

Oziq-ovqat mahsulotlari ishlab chiqarishga zamonaviy texnologiyalarni joriy etish bo‘yicha kelishuvga erishildi, O‘zbekiston mahsulotlarini Yevropaga eksport qilishning tarqatish kanallari muhokama qilindi.

Buxoroda suv bo‘yida ko‘ngilochar majmua qurish, farmatsevtika ishlab chiqarishini modernizatsiya qilish kabi yirik loyihalarni amalga oshirish masalalari ko‘rib chiqildi. Savdo-sanoat palatasining hududiy bo‘limi bilan konsessiyalarga asoslangan suvni tozalash loyihalari, shuningdek, DXSh formatida hamkorlik qilish imkoniyatlari muhokama qilindi.

Tomonlar O‘zbekiston iqtisodiyotining muhim tarmoqlariga sarmoya kiritish va innovatsion texnologiyalarni joriy etish uchun yangi istiqbollarni ochishga yordam beradigan yuqoridagi kelishuvlarni ilgari surish muhimligini ta’kidladilar.