Tashqi ishlar vazirligida O‘zbekiston va Yaponiya o‘rtasidagi strategik sheriklikni chuqurlashtirish masalalari muhokama qilindi

1-may kuni O‘zbekiston Respublikasi tashqi ishlar vaziri Baxtiyor Saidov Yaponiya Adliya vaziri Keisuke Suzuki bilan uchrashuv o‘tkazdi. Tomonlar O‘zbekiston va Yaponiya o‘rtasidagi strategik sheriklikni yanada chuqurlashtirish masalalarini muhokama qildilar, deb xabar bermoqda TIV matbuot xizmati.

Muloqot chog‘ida har bir mamlakat ikki va ko‘p tomonlama sheriklikni mustahkamlashda davom etayotganligi ta’kidlandi. Bir qator mintaqaviy va global masalalar, xususan, huquqiy islohotlar, sud-huquq tizimini modernizatsiya qilish, boshqaruv sohasini takomillashtirish hamda qonun ustuvorligini ta’minlash bo‘yicha ilg‘or tajriba almashish masalalari muhokama qilindi.

Shuningdek, mamlakatlarda amalga oshirilayotgan islohotlarga ko‘maklashuvchi adliya tizimlari o‘rtasidagi institutsional hamkorlikning yangi imkoniyatlari ko‘rib chiqildi. Konstruktiv ruhda o‘tgan uchrashuv ikki davlat o‘rtasidagi huquqiy hamkorlikni yangi bosqichga olib chiqish yo‘lida muhim qadam bo‘ldi.