Gujranvala va Gujrat shaharlarida O‘zbekiston-Pokiston hududlararo savdo-iqtisodiy aloqalarini rivojlantirish istiqbollari muhokama qilindi

O‘zbekiston elchixonasi diplomatlari Pokistonning Gujranvala va Gujrat shaharlariga tashrif buyurishdi, deb xabar qilmoqda ‘‘Dunyo’’ AA muxbiri. Tashrif doirasida ikki mamlakat o’rtasidagi iqtisodiy hamkorlikni rivojlantirishga qaratilgan uchrashuvlar bo‘lib o‘tdi.

Tashrifning birinchi kunida diplomatlar Gujranvaldagi biznes tadbirlarida qatnashdilar. Shahar Pokistonning uchinchi yirik sanoat markazi bo‘lib, milliy YaIMning 7 foizini ta’minlaydi. Shahar Sialkot va Gujrat bilan birgalikda mamlakatning yuqori eksport salohiyatiga ega bo‘lgan ‘‘Oltin uchburchak’’ iqtisodiy zonasini tashkil etadi.

Dastlab Pokiston sanoat va ishlab chiqarish vazirligi huzurida davlat–xususiy sheriklik asosida faoliyat ko‘rsatayotgan Gujranval biznes markaziga tashrif buyurilib, markaz rahbari Ahmed Ikrom Lon bilan uchrashuv bo‘lib o‘tdi. Ushbu markaz 1500 dan ortiq mahalliy va xalqaro sheriklarga ega va Pokiston sanoat mahsulotlarini chet elda targ‘ib qilish, tadbirkorlar uchun xalqaro aloqalarni o‘rnatishga ixtisoslashgan.

So‘ng diplomatlar santexnika, maishiy texnika, oshxonalar, quvurlar, chinni, to‘qima, to‘qimachilik, avtoulovlar kabi doimiy ravishda turli xil mahsulotlarning doimiy ko‘rgazmasi bilan tanishdilar.

Mahalliy ishlab chiqaruvchilar ishtirokida keng ochiq muloqot chog‘ida ikki mamlakat tadbirkorlari o‘rtasida to‘g‘ridan-to‘g‘ri aloqalar o‘rnatish, o‘zaro savdo hajmini oshirish, O‘zbekistonda qo‘shma loyihalarni amalga oshirish shartlari, shuningdek, ikki tomonlama savdo–iqtisodiy munosabatlarda yuzaga keladigan muammoli masalalar muhokama qilindi.

Muzokaralar yakunida joriy yilning noyabr oyida markaz va mahalliy sanoat vakillaridan iborat biznes delegatsiyasining O’zbekistonga tashrifini tashkil etish to‘g‘risida kelishuvga erishildi.

Gujranvala savdo–sanoat palatasi prezidenti Muhammad Siddiqiy Xon ishtirok etgan mahalliy sanoat vakillari va eksportchilar bilan uchrashuvda O‘zbekistonning sanoat va investitsiya sohalaridagi imkoniyatlari, investorlar uchun yaratilgan qulay sharoitlar, soliq va bojxona imtiyozlari hamda interaktiv muhokamalar taqdimoti bo‘lib o‘tdi.

Joriy yilning sentyabr oyida Gujranvala savdo-sanoat palatasi vakillari va ishbilarmon doiralar, shu jumladan to‘qimachilik korxonalari va boshqa yirik ishlab chiqaruvchilarning mamlakatimiz mintaqalariga bo‘lajak mahalliy hamkorlar bilan yangi loyihalarni batafsil muhokama qilish uchun tashrifini tashkil etish to’g’risida kelishuvga erishildi.

Tashrifning ikkinchi kuni Gujrat shahrida davom etdi. Ushbu shahar kichik va o‘rta biznes sohasidagi faoliyati, shuningdek, qishloq xo‘jaligi texnikasi, shamollatish va sovutish uskunalari, mebel, charm buyumlar, to‘qimachilik va zargarlik buyumlari sohalarida yuqori salohiyati bilan mashhur.

Tashrif davomida Gujrat savdo–sanoat palatasi prezidenti Muhammad Munir Peshavari, mahalliy ishlab chiqarish kompaniyalari va yangi tashkil etilgan ishbilarmon ayollar uyushmasi vakillari bilan uchrashuvlar bo‘lib o‘tdi.

O‘zbekistonda xorijiy investorlar uchun yaratilgan sharoitlar, soliq va bojxona imtiyozlari, erkin va maxsus iqtisodiy zonalar, logistika imkoniyatlari, shuningdek, mamlakatimizning Markaziy Osiyodagi strategik mavqei haqidagi batafsil taqdimotlar ishtirokchilarning katta qiziqishini uyg‘otdi.

Gujrat sanoatchilari o‘z mahsulotlarini sotish uchun Markaziy Osiyo bozoriga kirishga qiziqish bildirishdi va qisqa vaqt ichida O‘zbekistonda ishlab chiqarishni tashkil etish istiqbollarini o‘rganib chiqishlarini va tegishli takliflarni ishlab chiqishlarini aytishdi.

Ishbilarmon ayollar uyushmasi vakillari O’zbekistonda tadbirkor ayollar uchun yaratilgan imkoniyatlar, grantlar va davlat dasturlari to‘g‘risida ma’lumot olishga katta qiziqish bildirib, tajriba almashishga tayyor ekanliklarini bildirdilar.

Muzokaralar yakunida joriy yilning avgust oyida ikki mamlakat savdo-sanoat palatasi ko‘magida tadbirkorlar o‘rtasida videokonferentsiya tashkil etish, dekabr oyida Gujrat delegatsiyasining O‘zbekistonga tashrifini tashkil etish, shuningdek, qo‘shma loyihalarni amalga oshirish imkoniyatlarini o‘rganish maqsadida Pokiston mahsulotlari namunalarini mamlakatimizga yuborish bo‘yicha kelishuvlarga erishildi.

Ushbu biznes safari Gujranvala va Gujrat shaharlarining ishbilarmon doiralarini mamlakatimizda tadbirkorlar uchun yaratilgan sharoitlar bilan tanishtirishga va ikki mamlakat mintaqalari o‘rtasidagi ishbilarmonlik munosabatlarini istiqbolda yangi bosqichga olib chiqishga xizmat qildi.