Charm-poyabzal sanoatida O‘zbekiston-Turkmaniston hamkorligining istiqbollari

“O‘zcharmsanoat” uyushmasida Turkmanistonning “Maksad deri” kompaniyasi rahbari boshchiligidagi delegatsiya bilan uchrashuv bo‘lib o‘tdi. Uchrashuv charm-poyabzal sanoati sohasida ikki tomonlama hamkorlikni yo‘lga qo‘yish va yangi qo‘shma loyihalarni amalga oshirishga bag‘ishlandi.

Muzokaralar avvalida turkmanistonlik investorlarga mamlakatimiz charm-poyabzal va mo‘yna sanoatida yaratilgan sharoit va imkoniyatlar, ishlab chiqarish va sarmoyaviy salohiyat, eksport ko‘rsatkichlari haqida ma’lumot berildi. Shuningdek, mamlakatimiz va xorijiy investorlar uchun davlatimiz tomonidan yaratilayotgan imkoniyat va shart-sharoitlar, bojxona va soliq imtiyozlari haqida ma’lumot berildi.

Uchrashuvda Turkmaniston kompaniyasi rahbari mamlakatimiz hududlarida bo‘lib, korxonalardagi ishlab chiqarish jarayonlari bilan yaqindan tanishganini aytdi. Ularning imkoniyatlarini yuqori baholab, so‘nggi yillarda mamlakatimizning bu boradagi salohiyati yuksalib, “O‘zbekistonda ishlab chiqarilgan” tovar belgisi ostidagi mahsulotlarga bo‘lgan talabni to‘liq qondirishga qaratilganini alohida ta’kidladi. Shuning uchun ham O‘zbekiston bilan hamkorlik qilish niyatida.

Aytish joizki, bugungi kunda “Maqsad deri” Turkmanistondagi terini qayta ishlovchi yirik korxona hisoblanadi. Uning sutkalik quvvati 1000 dona charm materialdir. Ayni paytda Turkmanistonda atigi uchta bunday charm korxona mavjud. Kelgusida ularning sonini o‘ntaga yetkazish rejalashtirilgan. Shu bois Turkmaniston kompaniyasi O‘zbekistonning bu boradagi tajribasini o‘rganishni maqsad qilgan.

Turkmaniston ham poyafzalning 70 foizini xorijdan, xususan, O‘zbekistondan import qiladi. Muzokaralar chog‘ida turkmanistonlik investor O‘zbekistondagi ishbilarmonlik muhitining barcha imkoniyatlaridan foydalanish va bu yerda poyabzal fabrikasini tashkil etish istagini bildirdi.

“O‘zcharmsanoat” uyushmasida bo‘lib o‘tgan uchrashuv yakunida Turkmaniston kompaniyasiga yangi korxona ochish va ikki tomonlama hamkorlikni yanada rivojlantirishda amaliy yordam ko‘rsatishga qaror qilindi.