O‘zbekistonning sarmoyaviy salohiyati Singapur biznesini o‘ziga jalb qilmoqda

Singapur shahar-mamlakatida eng qadimiy biznes uyushmalaridan biri boʻlgan va 5 mingdan ortiq aʼzoga ega, Singapur-Hindiston savdo-sanoat palatasida (SICCI) Oʻzbekiston sarmoyaviy salohiyati taqdimoti oʻtkazildi, deb xabar beradi “Dunyo” axborot agentligi muxbiri. 

Mamlakatimizning Singapurdagi elchixonasi tomonidan SICCI hamkorligida tashkil etilgan tadbirda tog‘-kon sanoati, oziq-ovqat va kimyo sanoati, axborot texnologiyalari, bank ishi, turizm va logistika kabi sohalarda faoliyat yuritayotgan Singapurning yetakchi kompaniyalari vakillari ishtirok etdi.

O‘zbekistonlik diplomatlar yig‘ilganlarga respublikamizda amalga oshirilayotgan keng ko‘lamli islohotlar, bu yerda yaratilgan qulay sarmoyaviy muhit, shuningdek, mamlakatimizning barcha hududlarida mavjud erkin iqtisodiy va sanoat zonalarida tadbirkorlik faoliyatini tashkil etish uchun yaratilgan ayniqsa imtiyozli shart-sharoitlar haqida batafsil ma’lumot berdi. 

Tadbirda ishtirok etgan singapurlik ishbilarmonlar O‘zbekiston bilan hamkorlik imkoniyatlariga katta qiziqish bildirdi. Ularni mamlakatimizda tadbirkorlik faoliyatini tashkil etishning ko‘plab amaliy jihatlari, korxonani ro‘yxatdan o‘tkazish tartib-qoidalaridan tortib, O‘zbekistonda ishlab chiqarilgan tayyor mahsulotni uchinchi davlatlar bozorlariga eksport qilish imkoniyatlarigacha qiziqish uyg‘otdi. Elchixona diplomatlari tomonidan berilgan barcha savollar boʻyicha Oʻzbekistonning amaldagi qonunchiligiga tegishli havolalar, shuningdek, statistik va marketing maʼlumotlari bilan mustahkamlangan toʻliq maʼlumot berildi.

Singapur ishbilarmon doiralari vakillarida katta qiziqish uyg‘otgan tadbir yakunida SICCI rahbariyati mahalliy miqyosda hamkorlik imkoniyatlari bilan tanishish va O‘zbekistonlik hamkorlar bilan bevosita aloqalarni o‘rnatish maqsadida yaqin kelajakda O‘zbekistonga biznes missiyasini tashkil etish niyatida ekanligini ma’lum qildi.