Germaniyaning Teamdress kompaniyasi Farg‘onada ish kiyimlarini tikish niyatida

Germaniyaning Teamdress kompaniyasi Farg‘ona viloyatida ishchi kiyimlari tikish korxonasi quradi. Bu haqida Spot viloyat hokimligi matbuot xizmatiga tayanib xabar bermoqda.

Korxonaning ishlab chiqarish korxonasi “Ekoshahar” kichik sanoat zonasida joylashgan. Kecha Farg‘ona viloyati hokimi Xayrulla Bozorov kelasi oyda foydalanishga topshiriladigan mazkur inshootda bo‘ldi.

Loyiha qiymati 3,2 million dollar bo‘lib, korxonada 300 ta ish o‘rni yaratiladi.

Zavodda ishlab chiqarilayotgan mahsulotlar to‘liq Yevropa bozoriga eksport qilinadi. Loyihaning eksport salohiyati 25 million dollarga baholanmoqda.

Ayni paytda uchastkada uskunalar o‘rnatilmoqda. Shu bilan bir qatorda, kompaniya texnologiya va talablar bilan oldindan tanish bo’lgan xodimlarni ishga qabul qilmoqda.

Bundan tashqari, korxona hududida oshxona, xodimlarning bolalari uchun bepul bolalar bog’chasi, bolalar maydonchasi, maxsus dam olish joylari va hammom mavjud.