30 Oktyabr 2023

Senat tomonidan “Turkiy investitsiya jamg‘armasini taʼsis etish to‘g‘risidagi Bitimni ratifikatsiya qilish haqida”gi Qonun maʼqullandi

Oliy Majlis Senatining yalpi majlisida “Turkiy investitsiya jamg‘armasini taʼsis etish to‘g‘risidagi Bitimni (Anqara, 2023-yil 16-mart) ratifikatsiya qilish haqida”gi Qonun ko‘rib chiqildi, deb xabar beradi O’zbekiston Respublikasi Oliy Majlisi Senati matbuot xizmati.

Hujjatga ko‘ra, O‘zbekiston Respublikasi Tiklanish va taraqqiyot jamg‘armasining mablag‘lari O‘zbekiston Respublikasining Turkiy investitsiya jamg‘armasidagi ulushini Turkiy investitsiya jamg‘armasini taʼsis etish to‘g‘risidagi Bitimda (Anqara, 2023-yil 16-mart) nazarda tutilgan muddatlarda shakllantirish, shu jumladan uning boshlang‘ich kapitalidagi 2000ta aksiyaga obuna bo‘lish bilan bog‘liq xarajatlarni moliyalashtirish manbai ekanligi belgilanmoqda.

Investitsiyalar, sanoat va savdo vazirligi Turkiy investitsiya jamg‘armasini taʼsis etish to‘g‘risidagi Bitimning bajarilishi uchun masʼul bo‘lgan vakolatli organ etib belgilanib, O‘zbekiston Respublikasi Tiklanish va taraqqiyot jamg‘armasiga tegishli mablag‘larni o‘tkazish bo‘yicha buyurtmanomalar taqdim etib boradi. O‘zbekiston Respublikasi Markaziy banki Turkiy investitsiya jamg‘armasini taʼsis etish to‘g‘risidagi Bitim bo‘yicha depozitariy funksiyasini bajaradi.

Turkiy investitsiya jamg‘armasi doirasida hamkor davlatlar, jumladan, Ozarbayjon, Qozog‘iston, Qirg‘iziston va Turkiya bilan investitsiyaviy loyihalarni, xususan, elektrotexnika, yengil sanoat, avtosanoat, charm sanoati, qurilish materiallari sohalarida qo‘shma sanoat kooperatsiyasi kabi loyihalarni birgalikda amalga oshirishga xizmat qiladi.

Jamg‘armaning mablag‘lari mintaqalararo savdo, qo‘shma loyihalar, yashil iqtisodiyot, axborot texnologiyalari, transport, logistika va boshqa sohalarni rivojlantirishga qaratiladi.

Senatorlar Bitimni ratifikatsiya qilish O‘zbekistonga yangi muhim moliyaviy mexanizmning teng huquqli ishtirokchisiga aylanish imkonini berishini, undan esa o‘zaro savdo aylanmasi hajmini oshirish, iqtisodiyotning ustuvor tarmoqlarida investitsiya loyihalarini ilgari surish, shuningdek, turkiy davlatlar bilan infratuzilma va transport-logistika aloqalarini rivojlantirishda uchun foydalanilishini taʼkidladilar.

Muhokama yakunlari bo‘yicha senatorlar Qonunni maʼqulladilar.