09 Oktyabr 2023

O‘zbekiston-Xitoy: hamkorlik barcha darajalarda rivojlanmoqda

O‘zbekiston Respublikasi hukumati delegatsiyasi Xitoy Xalq Respublikasiga amaliy tashrifi doirasida Urumchi shahriga tashrif buyurdi, deb xabar bermoqda «UzDaily.uz».

Bugun, 9-oktabr kuni Urumchi shahrida O‘zbekiston Respublikasi Bosh vaziri Abdulla Aripov Xitoy Kommunistik partiyasi Markaziy qo‘mitasi Siyosiy byurosi a’zosi, Shinjon-Uyg‘ur avtonom rayoni partiya qo‘mitasi kotibi Ma Sinruy bilan uchrashuv o‘tkazdi. 

Qayd etilganidek, davlatlarimiz rahbarlarining muntazam muloqotlari, o‘zaro tashriflari va uchrashuvlari natijasida xalqlarimiz o‘rtasidagi ko‘p asrlik do‘stlik siyosiy, savdo-iqtisodiy va madaniy-gumanitar sohalardagi munosabatlarni mutlaqo yangi bosqichga olib chiqdi.

So‘nggi yillarda mamlakatlar o‘rtasidagi hamkorlik nafaqat davlat va hukumatlar, balki mintaqaviy miqyosda ham rivojlanib bormoqda.

Uchrashuvda O‘zbekiston va Xitoy bu boradagi hamkorlikni yanada kengaytirishdan manfaatdor ekani ta’kidlandi. O‘zaro munosabatlarni mustahkamlash va savdo hajmini oshirishda SHUAR alohida o‘rin tutadi.

Bugungi kunda mamlakatimizga Xitoyning ushbu hududidan zamonaviy texnologiyalar, asbob-uskunalar va boshqa mahsulotlar keltirilmoqda. Oʻz navbatida Oʻzbekiston SHUARga toʻqimachilik, mis, mineral oʻgʻitlar, qishloq xoʻjaligi mahsulotlari va boshqalarni eksport qiladi.

Bundan tashqari, aqlli qishloq xo’jaligida o’zaro hamkorlikni rivojlantirish imkoniyati mavjud.

Joriy yilning may oyida Sian shahrida boʻlib oʻtgan oliy darajadagi uchrashuvda umumiy qiymati qariyb 25 milliard dollarlik investitsiyaviy loyihalar boʻyicha kelishuvlarga erishildi.

Bugungi kunda SHUARning qator korxonalari bilan tuzilgan mazkur shartnoma doirasida metallurgiya, energetika, qishloq xo’jaligi va boshqa sohalarda istiqbolli loyihalar amalga oshirilmoqda.

O‘zbekiston uchun SHUARning yana bir muhim jihati shundaki, bu hudud mamlakatlarimiz o‘rtasidagi transport-logistika tizimining asosiy bo‘g‘ini hisoblanadi.

Bu yoʻnalishda Xitoy-Qirgʻiziston-Oʻzbekiston temir yoʻli qurilishini jadallashtirish boʻyicha hamkorlikda ish olib borish zarurligi taʼkidlandi.

Mavjud transport yo‘laklaridan tashqari “Xitoy-Qirg‘iziston-O‘zbekiston” va “Xitoy-Tojikiston-O‘zbekiston” multimodal transport yo‘laklarini rivojlantirish muhimligiga alohida e’tibor qaratildi.

Fan, taʼlim, kadrlar tayyorlash, madaniy-gumanitar sohalardagi hamkorlikni yanada rivojlantirish istiqbollari koʻrib chiqildi.

Shuningdek, Oʻzbekiston hukumati delegatsiyasining SHUARga tashrifi doirasida Xinjiang Hualing Industry & Trade Group, China Southern Power Grid, China National Chemical Engineering, Amer International Group, TBEA va boshqa yirik kompaniyalar rahbarlari bilan uchrashuvlar boʻlib oʻtdi. Hamkorlikni yanada rivojlantirish maqsadida ikki tomonlama uchrashuvlar o‘tkazildi.