Investitsiyalar, sanoat va savdo vazirligida Germaniya Iqtisodiy hamkorlik va taraqqiyot federal vazirligining Markaziy Osiyo, Pokiston va Afg‘oniston masalalari bo‘yicha bo‘limi boshlig‘i bilan uchrashuv bo‘lib o‘tdi

6-oktabr kuni O‘zbekiston Respublikasi Investitsiyalar, sanoat va savdo vazirligida vazir o‘rinbosari Akram Aliyevning Federal iqtisodiy hamkorlik va taraqqiyot vazirligining Markaziy Osiyo, Pokiston va Afg‘oniston masalalari bo‘yicha bo‘lim boshlig‘i Kristiane Amari bilan uchrashuvi bo‘lib o‘tdi, deb xabar qilmoqda ISSV matbuot xizmati.

Uchrashuv davomida ijtimoiy va infratuzilmaviy rivojlanish sohalaridagi O‘zbekiston–Germaniya sherikligining asosiy yo‘nalishlari, shuningdek, ikki tomonlama hamkorlikni yanada kengaytirish istiqbollari ko‘rib chiqildi.

O‘zbekiston Respublikasi va Germaniya Federativ Respublikasi o‘rtasida 2026–2027-yillarga mo‘ljallangan moliyaviy va texnik hamkorlik bo‘yicha bo‘lajak Hukumatlararo muzokaralarga tayyorgarlik ko‘rishga alohida e’tibor qaratildi. “Yashil” iqtisodiyot, kasbiy ta’lim, energetika, sifat infratuzilmasi, davlat boshqaruvi va ijtimoiy himoya sohalaridagi istiqbolli loyihalar muhokama qilindi.

Uchrashuv yakunida tomonlar ikki tomonlama hamkorlikni yanada mustahkamlash va qo‘shma loyihalarning samarali amalga oshirilishini ta’minlashdan manfaatdor ekanliklarini tasdiqladilar.