23 May 2024

O‘zbekiston va Turkiya siyosiy maslahatlashuvlarining navbatdagi davrasi bo‘lib o‘tdi

2024-yilning 20-may kuni Istanbul shahrida O‘zbekiston Respublikasi va Turkiya Respublikasi tashqi ishlar vazirliklari o‘rtasida siyosiy maslahatlashuvlarning navbatdagi davrasi bo‘lib o‘tdi, deb xabar beradi TIV matbuot xizmati.

Tomonlar delegatsiyalariga O‘zbekiston Respublikasi tashqi ishlar vaziri o‘rinbosari Muzaffar Madrahimov va Turkiya tashqi ishlar vaziri o‘rinbosari Nuh Yilmaz boshchilik qildi.

Muzokaralar chog‘ida O‘zbekiston-Turkiya hamkorligining bugungi holati va uni yanada rivojlantirish istiqbollari yuzasidan fikr almashildi. Hukumatlararo qo‘shma komissiya yig‘ilishi doirasida erishilgan kelishuvlarni amalga oshirishni jadallashtirish, shuningdek, oliy va yuqori darajadagi muloqotlar kun tartibini shakllantirishga alohida e’tibor qaratildi.

Muzokaralarda siyosiy, savdo-iqtisodiy, investitsiyaviy va madaniy-gumanitar sohalarda hamkorlikni rivojlantirish hamda parlamentlararo aloqalarni mustahkamlash masalalari muhokama qilindi.