Frankfurt-Mayn shahrida O‘zbekiston-Turkiya biznes-forumi bo‘lib o‘tdi

O‘zbekiston Bosh konsulligi “MÜSIAD Hessen e.V.” Tadbirkorlar uyushmasi, Xanau shahar Savdo-sanoat palatasi va O‘zbekiston tadbirkorlik va sanoat kengashi “UZBIC” nodavlat tashkiloti bilan hamkorlikda ikki davlat ishbilarmon doiralari ishtirokida biznes-forum tashkil etdi, deb xabar beradi “Dunyo” axborot agentligi muxbiri.

Tadbir O‘zbekiston, Turkiya va Germaniyaning yetakchi korxonalari o‘rtasida qo‘shma investitsiya loyihalarini amalga oshirish bo‘yicha o‘zaro manfaatli hamkorlikni kengaytirish, o‘zbek mahsulotlarining Germaniyaga eksportini ko‘paytirish, shuningdek, mamlakatimizning istiqbolli biznes sherigi va mashhur sayyoh sifatidagi nufuzini oshirishga xizmat qildi.

Forum arafasida «UZBIC» aʼzolari va «SUNTAT», «AHINUR» va «AK-PA Handels GmbH» kabi yetakchi nemis-turk kompaniyalari oʻrtasida B2B muzokaralari tashkil etildi. Uchrashuvlarda gastronomiya, to‘qimachilik sanoati, logistika, qurilish va boshqa sohalarda konstruktiv muloqot o‘rnatish, o‘zaro manfaatli hamkorlikni yanada kengaytirish bo‘yicha aniq qadamlar belgilandi.

Tadbirda O‘zbekiston o‘z tashqi siyosatida qardosh turk xalqi bilan savdo-iqtisodiy va do‘stona aloqalarni jadal rivojlantirishga alohida e’tibor qaratayotgani alohida ta’kidlandi.

O‘z navbatida, turk tomoni 50 yil davomida turk biznesi Germaniya va butun Yevropa Ittifoqi sharoitlarini yaxshi o‘zlashtirgani va moslashganini ta’kidladi. Bugungi kunda birgina Germaniyada 90 mingga yaqin nemis-turk korxona va kompaniyalari ro‘yxatga olingan. Shu bilan birga, ular o‘zbek eksportyorlariga mahsulotlarni Yevropa bozorlariga sotish va mahsulotlarni vaqtincha saqlash uchun omborxona maydoni bilan ta’minlashda yordam berishga tayyor ekanliklarini bildirdilar.

Shuningdek, yig‘ilganlar e’tiboriga O‘zbekistonning sayyohlik salohiyati, boy madaniyati haqida videorolik taqdim etildi. Turk diasporasi vakillari O‘zbekistonga, jumladan, ota-bobolari diyoriga ziyorat qilish uchun muntazam sayohatlar tashkil etish g‘oyasini qo‘llab-quvvatladilar.

Forum doirasida ikki tomonlama uchrashuvlar tashkil etilib, ularda ishbilarmonlik aloqalarini faollashtirish bo‘yicha keyingi amaliy qadamlar belgilab olindi. O‘zbekistondan trikotaj, kosmetika, quritilgan meva va meva-sabzavot mahsulotlarini eksport qilish sohasida yaqin hamkorlik bo‘yicha dastlabki kelishuvlarga erishildi. Kelgusi yilda ham xuddi shunday formatdagi uchrashuvni O‘zbekistonda o‘tkazish, shuningdek, Germaniyadagi o‘zbek va turk diasporasi vakillari ishtirokida Navro‘z bayramini birgalikda nishonlashga kelishib olindi.

Tadbirda O‘zbekiston xalqaro press-klubi jurnalistlari va operatorlari, mahalliy matbuot vakillari ishtirok etdi.

Xuddi shunday tadbir Praga shahrida, Chexiya Respublikasi sanoat va savdo vazirligida ham bo‘lib o‘tdi.

“UZBIC” 2022-yilda bir guruh tadbirkorlar tomonidan biznes va sanoatni rivojlantirishga ko‘maklashish maqsadida tashkil etilgan notijorat tashkilotdir.

«MUSIAD Hessen e.V» – 1996-yilda Germaniyadagi turk diasporasi tomonidan tashkil etilgan. Bu biznes tuzilmalari o’rtasidagi hamkorlik, shuningdek, ijtimoiy va madaniy almashinuv platformasi. Uning tarkibiga 1200 dan ortiq a’zo kiradi. Uning Germaniyada 10 ta, Yevropa boʻylab 22 ta, butun dunyo boʻylab 168 ta vakolatxonasi mavjud. Tashkilot Turkiya eksportining 25 foizini amalga oshiradi.