Frankfurt-Mayndagi Bosh konsullikda mintaqaviy Oʻzbekiston-Germaniya Savdo-sanoat palatasini tashkil etish masalalari muhokama qilindi

O‘zbekiston Bosh konsulligida “ESG Clean Energy” MChJ rahbari Ditrix Fetch bilan muzokaralar bo‘lib o‘tdi, deb xabar beradi “Dunyo” axborot agentligi muxbiri.

Uchrashuvda Germaniya tomoniga O‘zbekistonda amalga oshirilayotgan siyosiy va ijtimoiy-iqtisodiy islohotlar, xorijiy investorlarga imtiyozlar berish bo‘yicha amalga oshirilayotgan ishlar, shuningdek, qayta tiklanuvchi energiya manbalaridan foydalanish sohasidagi davlat siyosatining asosiy yo‘nalishlari haqida batafsil ma’lumot berildi.

Germaniya tomoni loyihani O‘zbekistonda amalga oshirish, xususan, qayta tiklanadigan energiya manbalari va energiya samaradorligini oshirish sohasida innovatsion texnologiyalar va ilmiy-texnik ishlanmalarni joriy etishdan manfaatdor ekanligini bildirdi. Shu bilan birga, kompaniya AQSh, Kanada, Germaniya va boshqa mamlakatlarda ham shunday loyihalarni amalga oshirmoqda.

Bundan tashqari, ikki tomonlama oʻzaro manfaatli hamkorlikni yanada rivojlantirish va qoʻshma investitsiya loyihalarini amalga oshirish imkoniyatlarini oʻrganish boʻyicha biznes vakillari oʻrtasida toʻgʻridan-toʻgʻri muloqotni yoʻlga qoʻyish maqsadida Ditrix Fetsh Frankfurtda Oʻzbekiston-Germaniya Savdo-sanoat palatasini tashkil etish masalasini koʻrib chiqishni taklif qildi.

Suhbat yakunida kompaniya rahbariyati O‘zbekistonning tegishli bo‘limlari bilan yuqoridagi loyihalarni batafsil muhokama qilish uchun O‘zbekistonga tashrif buyurishga tayyorligini bildirdi.